Sá sem bíður eftir draumastarfinu getur þurft að bíða lengi!
Þótt atvinnuleit virðist oft flókin þá er hægt að nálgast vinnuveitendur á markvissan hátt og eftir mismunandi leiðum.
Fyrsta skrefið - Undirbúningur
Hverjir eru styrkleikar mínir og veikleikar?
- Hvað vil ég? / Á hverju hef ég áhuga?
- Hvar munu hæfileikar mínir njóta sín? / Hvers konar starf hentar mér?
- Hvert er markmið mitt á vinnumarkaði?
Þegar þessum spurningum hefur verið svarað ætti svarið við tveimur grundvallarspurningum að liggja fyrir:
- Í hvers konar umhverfi mun ég helst dafna og ná árangri?
- Í hvers konar umhverfi vil ég helst starfa?
Annað skrefið - Leiðir fyrirtækja í ráðningarmálum
Oft er talað um innri og ytri ráðningar. Innri ráðningar eru stöðuhækkanir, tilfærsla innan fyrirtækis, auglýsingar innan fyrirtækis, endurráðningar (fyrrverandi starfsmenn ráðnir aftur) og skyldmenna- og/eða vinaráðningar. Við ytri ráðningar eru notaðar ráðningarstofur, ábendingar, óumbeðnar umsóknir, auglýsingar, menntastofanir (útskriftarnemar ráðnir), verkefnaráðningar og auglýsingar á internetinu.
Hafðu samband við ráðningarskrifstofur og kannaðu hvort einhver áhugaverð störf eru í boði, sérstaklega í þeim geira sem þú hefur áhuga á að vinna í. Skoðaðu heimasíður óskavinnuveitandans og aflaðu þér upplýsinga eftir öllum leiðum t.d. með því að hafa samband við starfsmann hjá fyrirtækinu sem þú þekkir eða kannast við eða spjalla við viðskiptavini fyrirtækisins eða aðra sem þekkja til.
Þriðja skrefið - Umsóknin
Þegar þú hefur áttað þig á sjáfum þér, óskum þínum, hæfileikum og áhugasviðum, þá þarftu að kynna þér leiðir óskafyrirtækjanna í ráðningarmálum. Svo er að sækja um í samræmi við niðurstöðurnar; viðtal hjá starfsmannastjóra, formleg umsókn lögð inn hjá þeim sem þú hefur áhuga á að vinna fyrir og/eða skráning hjá ráðningarstofum.
Mundu
Talið er að einungis 35% allra lausra starfa sé auglýstur í fjölmiðlum. Í hin 65% ráða fyrirtækin beint eða í gegnum ráðningarstofur án auglýsinga.